Jeep nag-dive sa 50-metrong bangin: 5 pasahero himalang nabuhay
BAGUIO CITY, Philippines — Limang pasahero ang himalang nabuhay matapos magtamo lang ng sugat nang mag-dive ang sinasakyan nilang pampasaherong jeepney sa may 50-metrong lalim na bangin sa Brgy. Tuding, Itogon, Benguet kahapon.
Sa ulat ng Itogon Police, kinilala ang mga sugatan na sina Rommel Apilado, 36, jeep driver; Jeremy Tomas, 24; Lefty Laoyan, 22; Joven Apilado, 28; at Armando Apilado, 54; pawang taga-Baguio Gold, Tuding, Itogon, Benguet.
Sa inisyal na imbestigasyon, habang bumabagtas sa naturang lugar ang jeep na minamaneho ni Apilado nang mawalan siya ng kontrol sa manibela hanggang sa tuluy-tuloy na mahulog sa bangin.
Nabatid na ang pampasaherong jeep ay patungong Baguio Gold Proper sa Tuding, nang mag-dive sa nasabing malalim na bangin.
Agad na rumesponde ang mga rescuers at matagumpay na naiahon ang mga sugatang pasahero at driver saka mabilis na isinugod sa ospital.
- Latest