Unsay panihapon sa Leyon?

Mipadayag sa ilang hunahuna ang upat ka mga kandidato sa pagka-presidente nga sila si Bise-Presidente Robredo, Senador Lacson, Senador Pacquiao ug Mayor Isko Moreno kalabot sa isyu sa South China Sea ug kon unsaon nila pagpatuman ug pag-implementar ang desisyon sa Hauge Court sa maong isyu.  Nagkadaiya ang ilang pamaagi apan wala gayod kanila’y mikonsiderar sa hunahuna ug posisyon sa China sa maong hisgotanan.  Hayan, kon ilang konsultahon ang China, mahisama lang sila sa estorya sa panagtigum sa mga leyon ug sa karnero diin gihisgutan kon unsay maayong ipanihapon sa mga leyon.  Fishkots!

Sa pinilian mahiuli

Tambag ni Senador Lacson sa mga botante nga magmakuti ug magmapensaron sila sa pagpili’g kandidato ug nga dili magpahaylo sa gitawag nga “politics of entertainment”.  Sa atong sistema nga ang mahimong botohan kadto lamang miduso sa ilang COC ngadto sa COMELEC, dako ang purohan nga dili magamit ang atong pagkakutihan.  Daghan unta ang angayan apan wala man magpapili tungod sa kakulang sa bahandi.  Ni’ng tambag ni Senador Lacson, hayan mahisangpot kita sa giingon sa linya sa awit nga, “Basi’g tantong pili, adto’s pinilian kita mahi-uli”. Paleho la!

Supak kay sige’g kapilde

Alang kang kanhi Senador Bongbong Marcos, walay dautan sa giingon nga political dynasty.  Dugang sa kanhi senador, kon tinuod nga nabalaka ang katawhan sa political dynasty, ang eleksyon maoy makapaundang niini.   Dili katawhan ang nasilag ug nabalaka sa political dynasty kon dili kadtong mga tawo nga buot mopuli sa namunoan apan wala magmalampuson bisan sa kadaghang higayon nga sila misulay.  Gihimo pa gani nila nga isyu batok sa kontra ang political dynasty.  Apan diay kon ugaling makalingkod na, di na pud buot magpapuli.  Estoryaheee!

Sweldo ra’y wa mosaka

Misaka karon ang presyo sa pandesal ug sliced bread gumikan usab sa pagsaka sa presyo sa trigo, ang nag-unang sangkap paghimo sa tinapay.    Dili kini maayo’ng balita alang sa mga konsumidor apan gihanigan man sa DTI ang price increase kay lage, kapin na kuno sa lima ka tuig ang milabay una pa mosaka ang presyo sa maong palaliton.  Lalisonon pa ang pamahayag sa DTI nga walay pagsaka ang presyo sa miaging 5 ka tuig, apan dili malalis nga dugay na’ng nikuyos pag-ayo ang gidak-on sa tinapay nga gibaligya. Misaka na gyud ang tanan; suholan na lang sa mamumo-o ang nagpabilin’g putot.  Saoonz! 

Isalikway ang pagdayeg

Namahayag si DOH Secretary Duque nga ang kaso sa coronavirus sa Metro Manila nag-anam na pagkunhod sa nangagi’ng mga adlaw.    Daw wala ma’y kadasig ug kahinangop ang katawhan niini’ng maanindot nga balita.  Tungod ba kaha kay ang kalihim man sa DOH maoy namahayag, kinsa sa nangagi’ng panahon, gi-awhag sa makadaghan nga modemitir na sa katungdanan?  Ginaingon baya nga, “Ang matuod nga leader modawat sa tanan pagbasol ug mosalikway sa mga pagdayeg”.  Ana-a ba kini nga kinaiya o hiyas ni Sec. Duque?  Kamo’y mag-igo!