Tamad na anak, utas sa saksak ng tatay
SARIAYA, Quezon, Philippines — Hindi na umabot pang buhay sa ospital ang isang 19-anyos na binata makaraang pagsasaksakin ng sariling ama kasunod ng paninita ng huli sa katamaran ng anak kamakalawa ng gabi sa Purok 4, Barangay Balubal ng bayang ito.
Ang biktima na nagtamo ng mga saksak sa iba’t ibang parte ng katawan ay kinilalang si Edrian Quejano, habang naaresto naman ang kanyang ama na si Arnold, 46, isang balut vendor na nahaharap sa kasong parricide.
Ayon kay P/Lt. Col. William Angway, chief of police dito, bandang alas-6:30 ng gabi ay pinagalitan ng ama ang anak dahil sa pagiging tamad at hindi nito pagtulong sa mga gawaing bahay.
Imbes na tumalima, nakipagsagutan pa umano ang biktima sa kanyang ama hanggang sa magpasya na lamang ang nakatatandang Quejano na umalis ng kanilang bahay at magtinda ng balut. Gayunman, sinundan pa siya ng anak saka pinagsusuntok kaya nagdilim na ang kanyang paningin at kumuha ng gulok saka pinagsasaksak ang anak.
Nagawa pa ng suspek na isugod sa ospital ang duguang anak subalit namatay din kinalaunan.
- Latest