Lider ng criminal group, 1 pa itinumba
CAMP NAKAR, Lucena City, Philippines — Patay ang sinasabing lider ng isang criminal group at isa pa matapos silang pagbabarilin ng hindi nakikilalang mga salarin kamakalawa sa magkahiwalay na bayan sa lalawigan ng Quezon, ayon sa ulat ng Quezon Police Provincial Office (QPPO).
Batay sa ulat ni QPPO director P/Col. Joel Villanueva, ang unang insidente ay naganap sa Sitio Centro, Barangay Talisay, Tiaong, Quezon.
Minamaneho sa pathway dakong alas-3:50 ng hapon ng lider ng criminal group na si Arnel Medrano alyas “Agi”, 52, ang isang motorsiklo nang harangin ito ng mga lalaki at agad siyang pinaulanan ng punglo. Nang mapuruhan ang biktima ay naglakad lamang ang mga suspek papatakas.
Nasa loob naman ng isang barung-barong sa Sitio Hibanga, Barangay San Isidro Candelaria, Quezon si Jeffrey Solis, 33, nang pagbabarilin ng hindi nakikilalang salarin dakong alas-9:30 ng gabi.
Blangko pa ang mga awtoridad sa motibo ng pagpatay sa mga biktima.
- Latest