P9.7 milyong puslit na sigarilyo nasabat ng Navy, 8 timbog
ZAMBOANGA CITY, Philippines — Umiskor ang mga tauhan ng Philippine Navy matapos nilang masabat ang P9.7-milyong halaga ng smuggled cigarettes at walong crew na lulan ng dalawang bangka malapit sa isla ng Sulu noong Sabado.
Ayon kay Rear Adm. Toribio Adaci Jr., commander ng Naval Forces Western Mindanao (NFWM), sakay ang mga navy personnel ng Multi-Purpose Attack Craft (MPAC) BA-489 at nagsasagawa ng maritime patrol patungong Tawi-Tawi nang kanilang maispatan ang dalawang Jungkong-type watercraft, may 8.4 nautical miles ng Sulade Island.
Ang naharang na dalawang bangka na may markang MB Fatima Shaina at MB Ameera, ay may sakay na tig-4 na crew at 278 master cases ng ibat’t ibang uri ng puslit na sigarilyo.
Nakilala ang mga nadakip na sina Abdulhain Abdurahim, Sharif Jinnol, Ajal Frede Sali, Mudjasam Salahuddin, Rasul Kulayan, Eddie Mustala Albasir, Alkam Abdurajik Lajid, at Ridzmar Tapdi Kalim, na karamihan ay residente sa bayan ng Indanan sa Sulu.
Sinabi ng opisyal na iniskortan na ng MPAC-B489 ng Navy ang dalawang bangka at mga crew patungong Zamboanga City at dumating nitong Linggo sa Naval Station Romulo Espaldon kung saan binigyan ng medical check-up ang mga dinakip sa Camp Navarro General Hospital.
Sa ginawang joint inspection at inventory ng Navy, Philippine Drug Enforcement Agency (PDEA), Philippine Coast Guard (PCG), at Bureau of Customs (BOC) sa mga nasabat na sigarilyo, lumalabas na nagkakahalaga ang mga ito ng P9,730,000.
- Latest