Higanteng kang-a sa pamakuna
Usa nako ka higala sa among chat group nangutana kanus-a manghatag og booster doses sa mga bakuna batok sa Covid-19 ang among lungsod sa Consolacion. Laing kauban namo sa chat group nitubag nga wa pay klaro, hinay kaayo ang munisipyo.
Lain namong higala nitambag nga adto pa-booster sa Waterfront Hotel, mosulti lang nga taga Cebu City siya. Laing kauban nipahibawo nga dunay booster shots nga mas duol sa Eversley Childs Sanitarium and General Hospital. Hangtod nga nitingog ang among silingan nga hapsay nga nakapa-booster sa SM Consolacion kay way linya.
* * *
Nag-iyahay dayon og pa-booster ang among kaubanan sa gisugyot nga mga lugar: SM Consolacion; Eversley; ug Waterfront. Nakugang silang tanan kay tinuod nga way linya, maihap ra sa tudlo ang nagpabakuna.
Nganong wa man kahibawo ang among mga silingan nga may booster doses na sa SM Consolacion? Nahibawo bang taga Jagobiao ug kasilinganang mga barangay sa Mandaue sa booster doses sa Eversley nga kutob ra niadtong Biyernes? Kahibawo bang taga Lahug, Apas, Luz ug kasilinganang mga barangay sa Cebu City sa pagpamakuna ni bisan kinsang walk-ins sa Waterfront?
* * *
Usa sa buslot sa kasayuran sa pamakuna mao ang makalibog nga pag-usab-usab sa venues, oras ug mga lagda. Pun-an pa sa pagtuo sa mga mayor nga usa nila ka post sa Facebook maghugop dayong katawhan. Kinahanglang ipahibawo ang bag-ong venues o kausaban pila ka adlaw sa di pa sugdan. Di sa adlaw na sa pagpatuman.
Gawas pa, bisan sa pangangkon sa public utilities, wa pay klarong suplay sa kuryente ug linya sa komunikasyon. Mas epektibo human sa dagkong katalagman taliwa sa pandemya ang rekurida ug sinuwat nga mga pahibawo sa bantang nga mga lugar.
* * *
Pagtapak sa dakong kang-a tali sa kadaghan sa ganahang magpabakuna ug sa aktuwal nga nabakunahan ang angayng unahon ni Presidente Rodrigo Duterte. Di ang pagpamalikas.
Sa Social Weater Stations (SWS) survey sa niaging buwan, 8% (8.7 milyones) ray di ganahang magpabakuna. Sa pikas nga bahin, 56.8 milyones pa ang fully vaccinated (52% pa sa nasudnong populasyon) hangtod sa Enero 20. Kon mabakunahan ang tanang nahibiling 52.2 milyones ka Pilipinhon makab-ot ang herd immunity. Nga di kinahanglang magpanghudlat ni bisan kinsa.
* * *
- Latest
