BBM-Sara UniTeam ratsada sa Calabarzon
MANILA, Philippines — Rumatsada na ang sortie nina UniTeam presidential candidate Ferdinand “BongBong” Marcos Jr. at running mate na si Davao City Mayor Inday Sara Duterte sa Calabarzon kahapon.
Nitong Miyerkules, sinimulan ng UniTeam tandem nina Marcos at Duterte ang paglilibot sa lalawigan ng Quezon kung saan pinapurihan nila ang mga lider ng kabataan sa kanilang aktibong pakikilahok sa mga pangunahing isyu sa bansa.
Tatlong lugar sa lalawigan ng Quezon ang binisita ng BBM-Sara tandem partikular na sa Lucena City habang ngayong Huwebes ay maglilibot sila sa Batangas.
Nagbigay rin sina BBM at Sara ng mensahe sa Green Army Youth Orientation Forum sa Queen Margarette Hotel sa Lucena City na pinuri ang magandang ugnayan ng sektor ng kabataan at ng Local Government Unit (LGU) sa pamamagitan ni Quezon Rep. Jayjay Suarez na ipinaliwanag na malaki ang tulong ng mga kabataan sa nation-building.
Sinabi ni Duterte na ang aktibong partisipasyon ng henerasyon ng mga kabataan ay makakatulong sa positibong pag-aayos ng buhay ng mga ito para sa tunay at pangmatagalang progreso.
Tinukoy ni Duterte, vice presidential candidate ng Lakas-CMD ang mga kaso ng illegal na droga, pagbubuntis ng mga tinedyer, AIDS at epekto ng climate change, bullying at kalusugang pangkaisipan ang mga pangunahing isyu na nakakaapekto sa sektor ng kabataan.
Nagbigay rin ng mensahe ng pagkakaisa sina Marcos, standard bearer ng Partido Federal ng Pilipinas (PFP) at Duterte sa Samahan ng Bisaya sa Dalahican (Sabida) sa pangunguna ng kanilang Pangulo na si Antonio Monterola.
Samantala, ipinakilala ni Lakas-CMD President at House Majority Leader Martin Romualdez si Duterte sa mga tao sa nasabing event. Nagbigay naman ng mensahe nang malugod na pagtanggap sa nasabing political rally si Quezon Gov. Danilo Suarez sa Lucena City Convention Center.
- Latest
