Pulis patay sa ambush
MANILA, Philippines — Patay ang isang pulis nang tambangan sa lungsod ng Tacurong kamakalawa ng hapon.
Ang biktima na namatay noon din ay nakilalang si Police Executive Master Sergeant (PEMS) Agusto “Agot” Braganza na nakatalaga sa Tacurong City-PNP dahil sa tama ng bala ng baril sa katawan.
Ayon sa ulat, sakay ang biktima sa minamanehong motorsiklo nito mula sa tahanan patungo sana sa kanyang sakahan.
Ngunit pagsapit sa Barangay Road, Purok Summer Snow, Barangay Baras, Tacurong City, dinikitan ito ng riding-in-tandem at pinagbabaril gamit ang kalibre .45 na pistola.
Mabilis namang tumakas ang mga salarin patungo sa direksyon ng town proper.
Sinabi ni Brgy. Baras Chairman Doroteo Delicana na wala naman umanong banta na natanggap ang biktima bago pa man ito pinatay.
Hustisya ngayon ang sigaw ng pamilya ni Braganza habang nagpapatuloy ang imbestigasyon ng Tacurong City PNP.
- Latest