Engineer sinibak sa puwesto dahil sa graft
LEGAZPI CITY, Albay — Tinanggal sa kanyang puwesto bilang district engineer ng 2nd Engineering District ng DPWH ng lalawigang ito si Engr.Danilo Villa matapos sampahan ng kasong graft ng isang kontraktor sa National Bureau of Investigation kamakalawa.
Si Engr.Villa ang pansamantalang pinalitan sa posisyon ng kanyang assistant na si Engr.Warren Asotea habang patuloy na dinidinig ang kaso sa Department of Justice.
Balak isampa ng DOJ sa pamamagitan ng NBI sa darating na araw ang kaso sa Ombudsman.
Maliban kay Villa,inihahanda na rin ang kaso laban sa ilan pa sa kanyang mga tauhan lalo na ang mga kasapi ng bids and awards committee ng Albay DPWH 2nd Engineering District na nakabase sa lungsod na ito.
Ayon kay Gerson Lisay ng G.O. Lisay Marketing, isa sa nagsampa ng reklamong anomalya at pang- aabuso sa posisyon laban kay Villa at iba pa ay nagpahayag ng malaking pasasalamat sa NBI at sa Pangulong Rodrigo Duterte dahil sa kautusan nitong imbestigahan at sampahan ng kaso ang mga district engineers na may mga reklamo ng anomalya.
Malaking bagay umano ang hakbang ng gobyerno para malinis laban sa katiwalian ang kagawarang ito ng pamahalaan.
- Latest