Quarterfinals slot pakay ng Ginebra

MANILA, Philippines — Target ng Barangay Ginebra ang quarterfinals berth habang hangad ng Terrafirma, Meralco at Rain or Shine na makabangon sa kamalasan.

Sasagupain ng Gin Kings ang Dyip ngayong alas-6 ng gabi matapos ang upakan ng Bolts at Elasto Painters sa alas-3 ng hapon sa 2022 PBA Philippine Cup sa Smart Araneta Coliseum.

Ang ikaapat na sunod na panalo ng Ginebra (5-1) ang muling magtatabla sa kanila sa San Miguel (6-1) sa liderato habang puntirya ng Terrafirma (0-6) ang una nilang panalo sa torneo.

Si assistant coach R­ichard Del Rosario ang muling gagabay sa Gin Kings dahil kasalukuyang miyembro si head coach Tim Cone ng coaching staff ng Miami Heat sa NBA Summer League.

“I’ve learned a lot from coach Tim through the years that we’re together and he is right, I cannot pretend or try to be like him because I would just be a poor copy,” ani Del Rosario.

Umiskor ang Ginebra ng 105-89 panalo sa Converge (2-5) noong Biyernes.

Nakatikim naman ang Terrafirma ng 86-114 kabiguan sa nagdedepensang TNT Tropang Giga (7-2).

Samantala, pipilitin ng Meralco (3-3) na makaba­ngon mula sa dalawang sunod na kamalasan habang ang five-game losing slump ang tatapusin ng Rain or Shine (1-5).

Si assistant Ronnie Magsanoc ang pansaman­talang hahawak sa Bolts habang wala si coach Norman Black na nasa US para bisitahin ang may sakit na ina.

“Whenever you lose, it’s a big concern because you’re going down within the standings,” ani Black matapos ang 89-90 pagkatalo ng Bolts sa Bossing (4-1) noong Huwebes.