Gilas balik-ensayo na
MANILA, Philippines — Balik-ensayo na ang Gilas Pilipinas para paghandaan ang FIBA Asia Cup na lalarga mula Hulyo 12 hanggang 24 sa Jakarta, Indonesia.
Si veteran mentor Nenad Vucinic ang hahawak sa pagsisimula ng ensayo ng Gilas Pilipinas ngayon.
Makakatulong ni Vucinic sa training camp si Gilas Pilipinas program director Chot Reyes.
Subalit sesentro muna ang atensiyon ni Reyes sa paghawak sa Talk ’N Text Tropang Giga dahil may laro ang kanyang tropa sa Huwebes at Linggo.
“Coach Nenad will have to continue training because I’m coaching in the PBA. I have a game on Thursday and Sunday, so we’ll need coach Nenad to continue training and preparing the team,” ani Reyes.
Kailangan ng Gilas na makabuo ng matikas na game plan dahil sasalang agad ito sa group stage (Group D) kasama ang New Zealand, Lebanon at India.
Unang makakaharap ng Gilas Pilipinas ang Middle East power Lebanon sa Hulyo 13.
Sunod na makakasagupa ng Pinoy squad ang India sa Hulyo 15 kasunod ang New Zealand sa Hulyo 17.
Ang mangungunang koponan sa bawat grupo ay awtomatikong papasok sa quarterfinals habang ang No. 2 at No. 3 teams ay maglalaro sa playoffs.
Sa playoffs kukunin ang huling apat na puwesto sa eight-team quarterfinal round.
Galing ang Gilas Pilipinas sa kampanya nito sa third window ng FIBA World Cup Asian Qualifiers.
Yumuko ang Pinoy cagers sa Kiwis sa labang ginanap sa Auckland bago nakaresbak sa India sa MOA sa Pasay City.
- Latest
