Lady Blazers puntirya ang 6-0
MANILA, Philippines — Puntirya ng College of Saint Benilde na hablutin ang ikaanim na sunod na panalo sa pagpapatuloy ng NCAA Season 97 women’s volleyball tournament ngayong araw sa Paco Arena sa Maynila.
Ngunit daraan ito sa matinding pagsubok laban sa mapanganib na San Sebastian College-Recoletos sa kanilang pagtutuos sa alas-12 ng tanghali.
Matapos ang Benilde-Baste game, sunod na masisilayan ang engkuwentro ng Mapua University at San Beda University sa alas-2:30 ng hapon.
Namamayagpag ang Lady Blazers bitbit ang imakuladang 5-0 baraha.
Nakasunod sa ikalawa ang defending champion Arellano University (5-1) at ikatlo naman ang San Sebastian (4-1).
Galing ang Lady Blazers sa impresibong 25-17, 25-11, 25-12 panalo laban sa Lady Cardinals para ukitin ang kanilang ikalimang sunod na panalo.
Bida sa naturang laro si Mycah Go na naglista ng 12 hits at 10 receptions.
Maliban kay Go, naaasahan din ng Benilde sina Jade Gentapa at Gayle Pascual habang si Cloanne Mondonedo naman ang sasandalan ng Lady Blazers sa playmaking.
Sa kabilang banda, mataas din ang moral ng San Sebastian na namayani sa University of Perpetual Help System Dalta sa bendisyon ng 24-26, 26-28, 25-20, 25-20, 17-15 desisyon.
- Latest