FIVB president bumilib sa hosting ng Pilipinas sa VNL Week 2
MANILA, Philippines — Bumilib si International Volleyball Federation (FIVB) president Ary da Silva Graca sa matagumpay na pamamahala ng Philippine National Volleyball Federation (PNVF) sa Week 2 ng men’s at women’s Volleyball Nations League (VNL).
Pinuri rin ni Graca ang Philippine Olympic Committee (POC) para sa pagresolba sa isyu sa nasabing national association.
“Thank you very much again Mr. President (Tolentino) … not only for the extraordinary lunch, but you helped us solve the problems here in the Philippines,” wika ni Graca sa POC president.
Matatandaang sinuspinde ng world governing body ang Philippine volleyball ng halos isang Olympic cycle at kinilala ang isang provisional national sports association.
Nakasama ni Graca sa tanghalian sa Tagaytay City noong Lunes ang kanyang asawang si Marina at si FIVB General Director Fabio Azevedo.
Matagumpay ang naging hosting ng PNVF sa Week 2 ng men’s at women’s VNL na idinaos sa Smart Araneta Coliseum sa Cubao, Quezon City.
“It’s a 10,” pagdeklara ni Graca sa pamamahala ni PNVF chief Ramon ‘Tats’ Suzara at ng local organizing committee personnel sa isang congratulatory meeting noong Linggo.
- Latest
