Parks isasama sa Gilas sa Asia Cup
MANILA, Philippines — PIano ng Samahang Basketbol ng Pilipinas (SBP) na maisama sa Gilas Pilipinas lineup si Bobby Ray Parks Jr. para sa FIBA Asia Cup na idaraos sa Hulyo 12 hanggang 24 sa Jakarta, Indonesia.
Wala pang pormal na pahayag ang SBP subalit ayon sa ilang source ay pinaplantsa na ang lahat para mapabilang ang mahusay na player sa lineup ng Gilas Pilipinas.
Nais sana ng SBP na makasama si Parks sa paglalaro ng Gilas Pilipinas sa FIBA World Cup Qualifiers laban sa New Zealand.
Subalit hindi na ito naisama dahil sa kakapusan sa oras para sa pag-aayos sa mga dokumentong kailangan sa pag-travel.
Nakapirma na ng kontrata si Parks sa Nagoya Diamond Dolphins sa Japan B.League.
Natapos na ang unang taon nito sa naturang Japanese league subalit nakakuha siya ng panibagong kontrata para sa susunod na season ng liga.
Wala ring magiging problema para sa Nagoya sakaling maglaro si Parks para sa Gilas Pilipinas dahil pinapayagan ng Japanese team na maglaro ang mga miyembro ng national team sa mga FIBA tournaments.
Matatandaang nasilayan sa aksyon sina Thirdy Ravena at Dwight Ramos — na parehong naglalaro noon sa Japan B.League — kasama ang Gilas Pilipinas.
Nakita si Parks sa laro ng Barangay Ginebra at San Miguel Beer sa PBA Governors’ Cup sa Mall of Asia Arena noong Biyernes.
Katabi ni Parks si PBA Commissioner Willie Marcial sa courtside seat ng MOA Arena.
May 11 players lamang ang nasa lineup ng Gilas Pilipinas para sa FIBA World Cup Qualifiers.
Ang koponan ay kinabibilangan nina RJ Abarrientos, SJ Belangel, Rhenz Abando, Geo Chiu, Lebron Lopez, William Navarro, Kevin Quiambao, Dwight Ramos, Carl Tamayo at Dave Ildefonso na gumaling na mula sa ankle injury.
- Latest