Blackwater sosyo na sa No. 2 spot
MANILA, Philippines — Sinong mag-aakala na makakasosyo ngayon ang Blackwater sa second place sa team standings matapos ang 29-game losing slump sa nakaraang PBA Season 46.
Pinasabog ng Bossing ang Terrafirma Dyip, 107-70, para sa kanilang ikalawang sunod na ratsada sa PBA Philippine Cup kahapon sa Ynares Center sa Antipolo City.
Katabla ng Blackwater sa No. 2 spot ang San Miguel at Meralco sa ilalim ng Barangay Ginebra (4-1).at kasunod ang nagdedepensang TNT Tropang Giga (4-2).
“We haven’t achieved anything yet. Next game is gonna be a tough game for us,” sabi ni coach Ariel Vanguardia na nakahugot kay rookie Ato Ular ng 16 points.
Nag-ambag si JVee Casio ng 14 markers habang may 12 at tig-11 markers sina Yousef Taha, Mark Dyke, James Sena at Barkley Ebona, ayon sa pagkakasunod.
Kumolekta si Joshua Munzon ng 17 points, 5 rebounds, 3 assists at 2 blocks sa panig ng Terrafirma (0-4).
Isang 18-4 atake ang ginawa ng Bossing sa second period para ilista ang 41-27 kalamangan sa 5:56 minuto nito matapos makatabla ang Dyip sa 23-23.
Tinangay ng Blackwater ang 54-38 halftime lead patungo sa pagpoposte ng 76-54 bentahe sa Terrafirma galing sa tres ni Sena sa natitirang 47 segundo.
Itinarak ng Bossing ang pinakamalaki nilang kalamangan sa 32 puntos, 100-68, buhat sa layup ni Mike Ayonayon sa huling 2:23 minuto ng final canto na sumelyo sa kanilang unang panalo sa limang beses na pagsagupa sa Dyip.
- Latest