Curry, Wiggins inilapit ang Warriors sa NBA Finals

DALLAS — Lumapit ang Golden State Warriors sa sweep at pagpasok sa NBA Finals matapos paluhurin ang Mavericks, 109-100, sa Game Three ng kanilang Western Conference finals series.

Tumipa si Stephen Curry ng 31 points, kasama ang limang triples, at game-high na 11 assists para pamunuan ang Golden State sa 3-0 lead sa kanilang serye ng Dallas.

Nag-ambag si Warriors’ forward Andrew Wiggins ng 27 markers tampok ang pagdakdak kay Mavericks superstar Luka Doncic para sa kanilang 93-83 kalama­ngan sa fourth period.

Umiskor si Klay Thompson ng 19 points at may tig-10 markers sina Draymond Green at Jordan Poole para sa Golden State.

Maaari na nilang walisin ang Dallas sa Game Four bukas para sa pagbabalik sa NBA Finals.

Wala pang koponang nakabangon mula sa 0-3 deficit sa NBA playoff series.

Kumolekta si Doncic ng 40 points at 11 rebounds sa panig ng Mavericks at may 26 at 20 markers sina Spencer Dinwiddie at guard Jalen Brunso, ayon sa pagkakasunod.

Hindi naman nakaiskor sina long-range specialists Reggie Bullock at Maxi Kleber na naimintis ang pinagsama nilang 12 tangka sa 3-point range.

Humugot si Curry ng 11 points sa third quarter kasama ang dalawang triples bilang bahagi ng kinamadang 30 points ng Warriors sa nasabing yugto para magtala ng double-digit lead.

Ang dalawang tres nina Doncic at Dinwiddie ang nagdikit sa Dallas sa 99-104 sa huling minuto  kasunod ang krusyal na tres ni Poole para muling ilayo ang Golden State sa 107-99 sa nalalabing 54.2 segundo.