Lady Bulldogs puntirya ang sweep sa Lady Maroons
MANILA, Philippines — Nais ng National University Lady Bulldogs na sakmalin ang first round eliminations sweep sa UAAP Season 84 women’s volleyball tournament.
Kaya naman sisikapin nilang makuha ang panalo sa pagsagupa sa University of the Philippines Lady Maroons ngayong alas-12 ng tanghali sa SM MOA Arena sa Pasay City.
Tangan ang malinis na anim na panalo, sasandalan ng Lady Bulldogs si Bella Belen na siyang umakbay sa kanila nang talunin ang Far Eastern University Lady Tamaraws, 25-10, 25-11, 25-11 noong Martes.
Tumikada si Belen ng 12 points, inaasahang makakatulong niya sa opensa si Ivy Lacsina para manatiling malinis ang karta papasok ng second round.
Pakay naman ng Lady Maroons na kalsuhan ang kanilang three-game skid, sina Nina Ytang at Joan Monares ang kanilang huhugutan ng puwersa.
Samantala, maghaharap ang Adamson University Lady Falcons at University of the East Lady Red Warriors ngayong alas-10 ng umaga, magkatapat naman ang defending champion Ateneo Blue Eagles at University of Santo Tomas Golden Tigresses sa alas-4 ng hapon habang magkakaldagan ang DLSU at FEU sa alas-6 ng gabi.
- Latest
