Warriors tumiklop sa Timberwolves

MINNEAPOLIS — Kumolekta si center Karl-Anthony Towns ng 26 points at 11 rebounds para igiya ang Minnesota Timberwolves sa 119-99 pagpulutan sa Golden State Warriors.

Nag-ambag si Jaylen Nowell ng 17 points kasunod ang 16 markers ni Malik Beasley para sa Timberwolves (21-22) na nasa No. 7 spot sa Western Conference.

Hindi naglaro ang mga may injury na sina Stephen Curry at Draymond Green para sa Warriors (31-12) na nalasap ang pang-limang kabiguan sa huling pitong laro para patuloy na ma­ging No. 2 sa West.

Kumamada ang Minnesota ng 40 points sa loob ng 16 minuto sa second half kasabay ng paglimita sa Golden State sa 19 markers.

Sa Detroit, nagsumite si Devin Booker ng 30 points, 4 rebounds at 4 assists para pamunuan ang NBA-leading Phoenix Suns (33-9) sa 135-108 pagbangga sa Pistons (10-32).

Ito ang pangatlong sunod na ratsada ng Phoenix na nakahugot kina center JaVale McGee at guard Cameron Payne ng tig-20 markers.

Pinamunuan ni rookie Cade Cunningham ang Detroit sa kanyang 21 points bago napatalsik sa third quarter.

Sa Denver, kumolekta si Rudy Gobert ng 18 points at 19 rebounds sa kanyang pagbabalik sa lineup para ihatid ang Utah Jazz (29-14) sa 125-105 panalo sa Nuggets (22-20).

Nagpositibo si Gobert sa COVID-19 at hindi nakita sa limang laro ng Utah.

Humataw si Nuggets big man Nikola Jokic ng 25 points, 15 rebounds at 14 assists para sa pang-siyam na triple-double ngayong season at ika-66 sa kanyang career.

Sa Sacramento, humakot si Christian Wood ng 23 points at 14 rebounds sa 118-112 paggiba ng Houston Rockets (13-32) sa Kings (18-28).

Ipinasok ni Eric Gordon ang mahalagang basket sa huling 12.5 segundo ng fourth quarter para sa 116-112 kalamangan ng Houston sa Sacramento.