Meralco kumpiyansa kay Bishop
MANILA, Philippines — Bago pa man umatras si dating NBA player Shabazz Muhammad ay ikinunsidera na ng Meralco bilang import si Tony Bishop.
Ngunit naglalaro pa ang American-Panamanian sa isang liga sa Puerto Rico.
“He’s one of the guys we’re looking up before we signed Shabazz Muhammad,” wika ni Black kay Bishop sa panayam sa sports program The Game. “Luckily for us, Tony had just finished his stint in Puerto Rico about a week ago, and he was willing to come over and play for us.”
Ang 32-anyos na si Bishop ang sasandalan ng Bolts sa kanilang pagsabak sa darating na 2021 PBA Governors’ Cup na bubuksan sa Disyembre 8 sa Ynares Sports Arena sa Pasig City.
Nabigo ang Meralco na makuha ang serbisyo ni PBA Best Import Allen Durham na kasalukuyang naglalaro sa Japan B.League.
Palaging nakakapasok ang Meralco sa Finals ng PBA Governors Cup, ngunit natatalo sa karibal na Barangay Ginebra sa tatlo sa huling apat na komperensya.
Idedepensa ng Gin Kings ang kanilang korona kasama si import Justin Brownlee.
Maliban kina Brownlee at Bishop, ang iba pang reinforcements na maglalaro sa 2021 PBA Governors’ Cup ay sina KJ McDaniels (NLEX), Olu Ashaolu (Alaska), McKenzie Moore (TNT Tropang Giga), Paul Harris (Phoenix), Brandon Brown (San Miguel), Cameron Forte (NorthPort), Antonio Hester (Terrafirma), Henry Walker (Rain or Shine), Jaylen Bond (Blackwater) at Mike Harris (Magnolia).
- Latest
