Batang Pinoy, PNG ilalarga ng PSC sa 2022

MANILA, Philippines — Kumpiyansa ang Philippine Sports Commission (PSC) na maisasagawa nila ang Batang Pinoy at Philippine National Games (PNG) sa susunod na taon kahit na mayroon pa ring pandemya.

Ayon kay PSC Commissioner Ramon Fernandez, nailatag na nila ang gagamiting health and safety protocols para rito.

“The protocols are already in place. Medyo mahirap talaga, may kahirapan, but if they were able to do it in Tokyo, we can do it also now,” ani Fernandez.

Bagama’t nasa gitna ng pakikipagharap sa coronavirus disease (COVID-19) pandemic ay matagumpay na nairaos ng Tokyo ang Olympic Games noong Hulyo kung saan kinuha ni weightlifter Hidilyn Diaz ang kauna-unahang gold medal ng Pilipinas.

May medical team ding nakasama si Diaz at ang 18 pang miyembro ng Team Philippines sa Tokyo Olympics na nakakuha ng sapat na eksperyensa sa pagsagupa sa COVID-19.

“May experience na iyong medical team natin. They were in Tokyo also observing how they did the protocols,” ani Fernandez. “Na-brief na rin natin iyong mga LGUs (Local Government Units) on how to go about the protocols.”

Ilan lamang ang Batang Pinoy at PNG sa mga taunang programa ng PSC na natengga nang pumutok ang pandemya simula noong Marso ng 2020.

Maaaring sa susunod na buwan ay magkakaroon na ng desisyon ang PSC Board, mga LGUs, Inter-Agency Task Force (IATF) at Department of Health (DOH) tungkol sa pagdaraos ng nasabing mga programa.