5 major international events lalahukan ng Pinas sa 2022
MANILA, Philippines — Limang bigating international competitions ang paghahandaan ng Team Philippines para sa susunod na taon.
Kaya naman nangangailangan ito ng malaking pondo, ayon kay Philippine Olympic Committee (POC) president at Tagaytay City Rep. Abraham “Bambol” Tolentino.
Nagsumite ang POC ng additional budget request na P450 milyon sa General Appropriations Act (GAA) sa Senado at Kongreso para sa preparasyon at pagsabak ng Team Philippines sa limang major international competitions sa 2022.
Ang P5 milyon ay para sa Winter Olympics sa Beijing (Pebrero 4-20), P150M para sa 6th Asian Indoor and Martial Arts Games (AIMAG) sa Thailand (Marso 10-20), P10M para sa The World Games sa Birmingham, Alabama, USA (Hulyo 7-22), P270M para sa 19th Asian Games sa Hangzhou, China (Setyembre 10-25) at P15M para sa Fifth Asian Youth Games sa Shantou, China (Disyembre 20-28).
Ayon sa POC chief, ang final composition ng delegasyong ilalahok sa Hangzhou Asian Games ay ibabase sa performance ng mga atleta sa AIMAG sa Thailand.
Inaasahang awtomatikong isasama sa national contingent si Tokyo Olympics gold medalist Hidilyn Diaz bagama’t hindi kasama ang weightlifting sa AIMAG.
- Latest