Donaire si Gaballo ang makakalaban

Hindi si Casimero...

MANILA, Philippines — Ipinag-utos ng World Boxing Council (WBC) na depensahan ni reigning WBC bantamweight champion Nonito Donaire Jr. ang titulo nito laban kay mandatory challenger Reymart Gaballo.

Kaya naman posibleng matagalan pa ang pagtutuos nina Donaire at World Bo­xing Organization (WBO) bantamweight king John Riel Casimero.

Inilabas ng WBC ang statement nito isang araw matapos magkaayos sina Donaire at Casimero.

Sa isang online sports show, nagkasama sina Donaire at Casimero.

Nagpakumbaba na si Casimero kasabay ng paghingi ng tawad kay Donaire sa mga ilang below-the-belt na komento nito.

Dahil sa pag-aayos nina Donaire at Casimero, inaasahan na sana ng mga boxing fans na matutuloy na ang unification bout ng dalawang Pinoy world champion.

Subalit naglabas ng statement ang WBC para sa mandatory title defense ni Donaire kontra kay Gaballo.

Galing si Gaballo sa split decision win kay Puerto Rican Emmanuel Rodriguez noong Disyembre sa labang ginanap sa Mohegan Sun Arena sa Connecticut, USA.

Hawak ni Gaballo ang malinis na 24-0 rekord.

Sa kabilang banda, sariwa pa si Donaire sa fourth-round knockout win kay Nordine Oubaali ng France noong Mayo upang maagaw ang WBC crown.

Maliban sa Donaire-Gaballo fight, ipinag-utos din ng WBC na harapin ni WBC featherweight king Gary Russell si Pinoy mandatory challenger Mark Magsayo.

Malinis ang rekord ni Magsayo na galing din sa impresibong 10th round knockout win kay Mexican Juli Ceja noong Agosto 21 (Agosto 22 sa Manila) sa undercard ng laban nina Manny Pacquiao at Yordenis Ugas.