Donaire binanatan si Casimero

MANILA, Philippines — Sa pagkakataong ito, si World Boxing Council (WBC) bantamweight champion Nonito “The Filipino Flash” Donaire naman ang bumanat kay World Boxing Organization (WBO) bantamweight titlist John Riel Casimero.

Ayon kay Donaire, wala naman itong pinipirmahang kontrata para sa kanyang susunod na laban kay WBA at IBF bantamweight champion Naoya Inoue.

Sinabi ni Donaire na mismong si Top Rank Promotions chief Bob Arum na ang nagkumpirma na walang Casimero-Inoue na naikasa.

Inakusahan pa ni Donaire na takot si Casimero kapag kontrata na ang pinag-uusapan.

Ayaw umano ni Casimero na pumirma sa kontrata dahil sa VADA (Voluntary Anti-Doping Association).

“Funny that when it comes to contracts, all of a sudden Casimero starts running scared, #fakenews of Inoue (Arum denied last week), and refusing to sign just because of VADA,” ani Donaire sa kanyang post sa social media.

Nagbiro pa si Donaire na posibleng walang printer si Casimero kaya’t hindi nito mai-print ang kontrata para sa laban.

Maliban dito, binanatan din ni Donaire si Casimero sa tila insulto nito sa pananalita ni Hall of Famer Freddie Roach na may parkinson’s disease.

Sa isang video na nagsulputan sa social media, sinabi ni Casimero na ayaw nito si Roach dahil hindi nito maintidihan ang “bulol” na pagsasalita ng American trainer. 

Mas gugustuhin nito ang Pinoy trainer.