Gilas Women palaban sa FIBA Asia Cup
MANILA, Philippines — Palaban ang Gilas Women sa FIBA Women’s Asia Cup na idaraos sa Setyembre 27 hanggang Oktubre 3 sa Prince Hamza Arena sa Amman, Jordan.
Alam ni Gilas Women head coach Pat Aquino na malaking hamon ang kanilang haharapin sa Jordan.
Subalit nanindigan itong hindi basta-basta susuko ang kanyang bataan.
Dala-dala ng Pinay cagebelles ang pusong palaban na gaya ng mantra ng Gilas Pilipinas.
“Lots of challenges but for sure we’ll give our best everytime we compete abroad,” ani Aquino sa The Game.
Nasa Group B ang Pilipinas kasama ang powerhouse teams na China, Australia at Chinese-Taipei.
Unang makakasagupa ng Pinay squad ang China sa Setyembre 27 kasunod ang Australia sa Setyembre 28 at ang Chinese-Taipei sa Setyembre 29.
Tanging ang dalawang mangungunang koponan lamang ang aabante sa semifinals.
Sabik nang makalaro ang Gilas Women matapos matengga ng halos dalawang taon.
Huli itong nasilayan sa aksyon nang masungkit ng tropa ang gintong medalya sa 2019 Southeast Asian Games na ginanap sa The Arena sa San Juan City.
“Success is having to play again. That’s one thing for sure. Kasi sobrang tagal naming hindi nakapaglaro,” ani Aquino.
Babanderahan ang tropa nina Afril Bernardino, Clare Castro, Ella Fajardo, Ria Nabalan at Janine Pontejos kasama sina France Mae Cabinbin, Ana Castillo, Kristine Cayabyab, Camille Clarin, Karl Ann Pingol, Nathalia Prado at Marizze Tongco.
- Latest
