Pagsukwahi sa kaugalingong sulti
Si Presidente Ferdinand Marcos Jr. mahimong wa kasabot sa iyang gipanulti o wa magtagad sa pagsukwahi sa iyang lakang: Nideklarar siya nga di itahan ang bisan usa ka pulgada sa West Philippine Sea (WPS) ug nga panalipdan ang atong nasudnong teritoryo; pero nisugyot siya og dugang mga proyekto para sa higanteng kompaniya sa China nga apil sa nagtukod sa artificial islands sa WPS.
Way mga sakop sa media nga gipatambong, Malakanyang ra ang nipahibawo uban ang letrato sa pakigtagbo ni Marcos sa kadagkoan sa China Communications Construction Co. Ltd. (CCCC).
* * *
Ang CCCC nga gipanag-iya sa gobiyerno sa China gipangulohan sa ila mismong chairperson nga si Wang Tongzhou atol sa tigom. Way hisgot ang palasyo nangutana ba si Marcos sa ilegal nga pagtukod sa CCCC og mga isla ug mga istrukturang militar sa Zamora Reef, Panganiban Reef ug Kagitingan Reef.
Labaw pang way ek ang administrasyon kon may nakahunghong ba ni Marcos nga ang CCCC apil sa 24 ka kompaniya sa China nga gi-blacklist sa Estados Unidos tungod sa ilang pag-apil sa militarisasyon sa South China Sea apil na sa WPS.
* * *
Gawas sa iyang kaugalingong sulti, giisnab sab ni Marcos ang tambag ni kanhi Foreign Affairs Secretary Teodoro Locsin Jr., nga iyang gitudlo nga embahador sa Pilipinas para sa Britanya. Matud ni Locsin angayng putlon sa Pilipinas ang bisan unsang transaksiyon sa CCCC ug ubang mga kompaniya.
Pero gawas ni Marcos nisukwahi sab ni Locsin si kanhi Presidente Rodrigo Duterte. Nga nihangop sa CCCC aron pagpatuman sa labing dagkong proyekto sa iyang kinaham nga Davao City.
* * *
May sukaranan ang paglab-as sa awhag sa pagkanselar sa kapin sa P100 bilyones nga balor sa mga proyekto sa CCCC sa Pilipinas. Labi na tungod sa pagduda nga ang China nilusad na og ballistic missiles gikan sa artipisyal nga mga isla sa WPS.
May mga implikasyon sa nasudnong seguridad ang pagtukod sa CCCC sa ?gisugyot nga Sangley Point International Airport sa Cavite ug sa kontrobersiyal nga reclamation projects Manila Bay nga duol kaayo sa headquarters sa Philippine Navy. Bisan ang mga negosyante sa Sugbo naalarma sa gikatakda nga pagpatuman sa CCCC sa pipila ka higanteng mga proyekto dinhi sa ato.
* * *
- Latest
