EDITORYAL - ‘Malalaking tao’ sa likod ng agricultural smuggling
Kaya pala hindi masawata ang agricultural smuggling ay dahil mga “malalaking tao” ang nasa likod nito. At mismong mga opisyal sa Department of Agriculture (DA) at Bureau of Customs (BOC) ang mga sangkot. Hindi lang basta mga karaniwang empleyado sa DA at BOC ang itinuturong suspected smugglers o protektor ng smugglers kundi matataas na opisyal mismo.
Ayon sa 63 pahinang committee report ng Senado na nag-imbestiga sa malawakang agricultural smuggling, 22 opisyal, kasama ang BOC chief ang sangkot. Sa report na inilabas ni Senate President Tito Sotto III, pinangalanan niya sina BOC commissioner Rey Leonardo Guerrero, Deputy Commissioner for Intelligence Raniel Ramiro, Deputy Commissiioner Vener Baquiran, BOC directors Jeoffrey Tacio at Yasser Abbas bilang protectors ng smugglers.
Kasama rin sa report ni Sotto ang director ng DA at Bureau of Plant Industry na si George Culaste; BFAR director Eduardo Gongona at Laarni Roxas ng DA-BPI’s plant quarantine services division.
Itinanggi naman ng mga nabanggit ang akusasyon sa kanila. Pinangalanan din naman sa report ang mga inaakusahang smugglers. Ang pagbubunyag ni Sotto sa mga nasa likod ng agri smuggling ay ginawa niya makaraang makausap kamakailan si president-elect Ferdinand Marcos Jr.
Noong nakaraang linggo, inihayag ni Marcos na siya muna pansamantala ang magiging DA secretary. Ayon sa kanya, maraming problema sa DA at kailangang ireporma. Maaaring kaya nasabi ito ni Marcos ay dahil sa Senate report ni Sotto. Kailangan na talagang tutukan ang DA ukol sa isyu ng agri smuggling.
Hindi lamang DA ang problema kundi pati BOC. Sa report, magkakutsaba ang mga opisyal ng dalawang tanggapan kaya hindi masawata ang smuggling.
Sa pagkakabulgar ng agri smuggling na kinasasangkutan ng mga opisyal ng DA at BOC, nararapat nang gumawa nang mabigat na hakbang si Marcos pagkapanumpa niya bukas. Kailangang linisin mula itaas hanggang sa ibaba ang dalawang tanggapan. Ito ang nararapat.
- Latest
