EDITORYAL - Mga kaso ng dengue parami nang parami

NADARAGDAGAN ang kaso ng COVID-19 pero hindi pa umano ito nakababahala, ayon sa Department of Health (DOH). Ang nakababahala nga­yon ay ang pagdami ng dengue cases na maski sa Metro Manila ay tumaas ang bilang.

Ayon kay DOH Undersecretary Ma. Rosario Ver­geire, nakapagtala na ng 3,408 na kaso sa National Capital Region (NCR) mula Enero hanggang Mayo ngayong taon. Mas marami umano ang kaso ngayon kumpara sa nakaraang taon sa parehong buwan.

Dumarami rin ang kaso sa mga probinsiya. Ayon sa DOH, nakapagtala na ng 2,737 kaso sa Bulacan; Cebu City, 1,254; Isabela, 1,149; Negros Occidental, 1,161; St. Bernard, Southern Leyte, 207; Kidapawan City, 326 at Zamboanga City, 315. Ayon pa sa DOH, karamihan sa mga tinamaan ng dengue ay mga bata.

Naghahatid ng pangamba ang pagdami ng kaso ng dengue lalo pa’t sa Agosto ay magbubukas na ang face-to-face classes. Dalawang taon na hindi nagamit ang mga school kaya malaki ang posibi­lidad na naging pugad na ito ng mga lamok. Nararapat na bago magsimula ang F2F sa Agosto ay nilinis na ang mga public school. Buhayin ang “Brigada Eskuwela” kung saan ay nagkakaroon nang pagtutulungan at sama-samang paglilinis.

Ang dengue ay hatid ng lamok na tinatawag na Aedes Aegypti. Ang lamok na ito na kadalasang nangangagat tuwing araw ay makikilala sa batik-batik nitong katawan.

Sintomas ng dengue ang lagnat, pagkakaroon ng pantal-pantal sa balat, pananakit ng ulo, kasu-ka­suan, at pagsusuka. Ipinapayo na kapag nakaranas ng mga ganitong sintomas, kumunsulta sa doktor.

Ang kalinisan sa loob ng bahay at kapaligiran ang susi para mapigilan ang pagkalat ng mga lamok. Huwag iistak ang mga basyong bote, lata, gulong ng sasakyan, paso ng halaman sapagkat napupuno ito ng tubig sa panahon ng tag-ulan. Linisin din ang mga kanal na hindi umaagos ang tubig sapagkat dito nangingitlog ang mga lamok.

Ang pagbibigay ng gabay sa mamamayan ukol sa dengue ay nararapat paigtingin ng DOH. Mag­bigay ng impormasyon sa mamamayan ukol sa dengue­ upang ganap itong maiwasan. Marami pa rin ang salat sa kaalaman ukol sa mga lamok na naghahatid ng sakit lalo ang mga nasa liblib na lugar.

Kung labis ang ginagawang pag-iingat sa COVID-19, ganito rin ang gawing pag-iingat sa dengue sapagkat delikado ito.