Ang patibong ng China
Mag-ingat sa tinatawag na”debt trap” diplomacy ng China. Mayaman ang China at kayang-kayang pautangin nang malaking halaga ang mga pobreng bansang mahigpit ang pangangailangan ng pondo.
Unlimited ang iaalok na tulungan ng China pero kapag wala nang kakayahang magbayad ang isang bansa, saka ito iipitin sa mga konsesyong politikal. At pangkabuhayan na paborable sa naturang bansa.
Sa harap ng mga problema ng Pilipinas, salapi ang mahigpit na pangangailangan nito. Nag-aalok ang China ngayon ng pagsusuplay sa atin ng mga produktong agrikultural. May mga nakaraang utang pa tayo sa China sa termino ni Presidente Duterte na hindi pa nababayaran.
Ang sabi ng embahador ng China sa uupong bagong presidente ng bansa na si Bongbong Marcos, gagawin ng pamahalaan niya ang lahat para matulungan ang Pilipinas sa kakulangan sa pagkain. Dapat masusi munang suriin ni Marcos, Jr. kung gagawa ng kasunduan at alamin ang lahat ng kondisyon bago lagdaan upang umiwas tayo sa kapahamakan.
Maganda ang alok upang tuparin ni Marcos, Jr. ang kanyang mga pangakong pagpapababa sa presyo ng mga produktong pang-agrikultura, lalo na ang bigas. Pero naniniwala akong may angking talino naman siya upang kilatisin ang mabubuong kasunduan.
Sabi nga, mas mabuting matuto tayo mula sa karanasan ng iba kaysa tayo ang dumanas ng kapahamakan. Ang debt trap ay isang terminolohiya sa International financing na dito’y nagbibigay nang malaking pautang ang isang mayamang bansa sa mga mahirap na bansa upang magtamo ng political leverage.
- Latest