Away na ito ng taumbayan
Ang nagaganap na political tension ngayon ay away na ng 31-milyong bumoto kay Ferdinand Marcos Jr. at ng 14-milyong bumoto kay Leni Robredo. Kaugnay pa rin ito ng isinampa sa Korte Suprema na petisyon para ipawalang-bisa ang Certificate of Candidacy ni Marcos na nauna nang ibinasura ng Commission on Elections (Comelec).
Sakaling paboran ng Korte and petisyon at madiskuwalipika si Marcos, tatanggapin ba ito ng mahigit sa 31-milyong bumoto at nakipaglaban sa kanya? At sakaling mabigo ang disqualification move, siguradong patuloy na mag-aalsa ang mga tumututol na manungkulang presidente si Marcos.
Magkakaroon sigurado ng legal battle kung sino ang dapat pumalit kay Marcos: si Robredo ba o si Vice President-elect Sara Duterte? Iyan ay isang sensitibong usaping gugugol ng mahabang panahon bago mapagdesisyonan ng Korte Suprema.
At anumang desisyon ang ibaba ng Korte ay pihong mayroon pa ring tututol at magpoprotesta dahil walang Ibig magpatalo. Nakakapangamba ang posibleng maganap na senaryo dulot ng pagkakawatak-watak ng taumbayan.
Sabi nga ni Senate President at natalong Vice Presidential candidate Tito Sotto, ito ay magiging Constitutional crisis na paparalisa sa pag-usad ng bansa sa kaunlaran.
Samantala, tinanggap na ng Korte ang petisyon at pinasasagot na ang kampo ni Marcos at mismong Comelec. Matagal na proseso ang palitan ng sagot ng magkabilang panig at habang walang kaayusan ang pamahalaan, paanong maaasikaso ang mga dambuhalang problema ng bansa sa ekonomiya, kawalan ng trabaho at pandemya?
- Latest