Tumanggi! So?
Matagal ko nang natatalakay ang salitang “perception”. Ito ‘yung pananaw ng isang indibidwal base sa kanyang nakikita, naririnig, nababasa at naramdaman.
Kung ang pananaw ng isang indibiduwal ay kaiba sa kanyang mga naririnig, at nakikita, natural lamang na magiging matatag ang desisyon nito dahil sa kanyang personal na pang-unawa o persepsiyon at karanasan.
Naging isang malaking pasabog ang pagtanggi ni presidential candidate Bongbong Marcos sa isinagawang presidential interview nang malaking network.
Tanong ko, Why make such a big fuss If BBM snub the presidential interview? Ano bang meron dito? What’s the big deal? Kanino bang kawalan ang pinag-uusapan dito, sa mga taong manonood na botante, sa malaking network o sa kandidato?
Baka nagbubulag-bulagan tayo na buo na ang persepsiyon ng mga tao. May interbyu o wala, iboboto pa rin nila kung sino ang kanilang gusto – mahirap na itong mabago. Ganundin sa ibang kandidato – dumalo man o hindi ang isa sa kanila, mayroon na silang mga sariling botong matatanggap.
Ang kaso mo, pumipiyok ang mga kampong gigil sa tumangging kandidato. Paborito nilang kuyugin ang mama, na tinawag nilang “duwag”.
Well, persepsiyon din ito ng mga nanggagalaiting kampo laban kay BBM.
Pahayag naman ng partido ni BBM, may “paniwala” sila na magiging “bias” ang interbyu.
Sa totoo lang, wala akong masamang tinapay sa host ng nasabing programa, saludo ako sa kanya dahil talaga namang isa siyang respetadong mamamahayag. Kaya lang, nabuo na ang persepsiyon ng kampo ni BBM na magiging tablado sa panayam ang kanilang kandidato.
Maaaring hindi talaga ang host ng programa ang pinatutukuyan nila kundi ang istasyong pinagsisilbihan ng mamamahayag.
Muli, saan ba nanggaling ang persepsiyon nilang iyon? Maaaring mula sa kanilang masamang karanasan noon. Punto ko lang naman para sa mga kapatid ko sa industriya, kapag kayo ay tinanggihan, huwag masasaktan!
- Latest