Kahit ‘di kilala, ang kursunada, iboto mo
Sampung kandidato sa pagka-Pangulo ang isinama ng Commission on Elections (Comelec) sa mga inilimbag na balota para sa national elections sa Mayo. Matangi kina Bongbong Marcos, Leni Robredo, Isko Moreno, Manny Pacquiao, Ping Lacson, Leody de Guzman, Ernesto Abella at Norberto Gonzales, ang karamihan ay virtually unknown o hindi kilala.
Sabi ng Comelec, kahit hindi kilala ‘yung ibang nakasama sa balota, nagprisinta sila ng requirements na nagpapatunay na kuwalipikado silang tumakbo kaya hindi itinuring ng nuisance candidate.
Madalas, porke ang napipili nating kandidato ay walang name recall dahil mga kaibigan lang at kamag-anak ang nakakikilala, kahit inaakala nating karapat-dapat sila ay hindi na natin ibinoboto. Kaya madalas, maraming showbiz personalities ang nagwawagi sa eleksyon dahil matunog ang kanilang pangalan. Nagwawagi kahit walang kakayahan.
Iyan ang problema ng ating electoral system.
Bago ka makatakbo sa pambansang posisyon, kailangan mo pa ng makinarya. Ang tinatawag na makinarya ay puwedeng super-popularity o salapi. Minsan, kulang ang isambilyong piso mo para makapagsulong ka ng national campaign. Kaya paano makakakandidato si Mang Pedro na isa lang elementary teacher at hindi kilala sa buong bansa?
Buti nga at mayroon nang social media para makayanan ng mga ordinaryong mamamayan na walang masyadong pera na makapangampanya sa mahika ng Internet. Pero hindi pa rin epektibo ito kumpara sa makinarya ng salapi at katanyagan.
Basta ang mahalaga, iboto natin ang inaakala nating karapatdapat. Malamang matalo pero bumoto tayo ayon sa ating konsensya.
- Latest