EDITORYAL – Magpakita ng halimbawa

MAY mga barangay officials na hindi pa bakunado at ito ang nararapat na masampolan ng kautusan ni President Duterte na higpitan ang paggalaw para mapigilan ang pagkalat ng virus. Sa direktiba ng Presidente noong nakaraang linggo, nararapat manatili na lamang sa bahay ang mga hindi bakunado. Ang mga magmamatigas na patuloy na lumalabas ng bahay ay pinaaresto sa barangay officials.

Pero paano kung ang mga barangay officials pala ang hindi naman bakunado? Paano kung ang mga nagpapatupad ng batas ang hindi naman pala sumusunod sa pinag-uutos?

Sabi ni Department of Interior and Local Go­vernment (DILG) Undersecretary for barangay affairs Martin Dino, nararapat mag-resign o mag-file ng leave ang barangay official na hindi bakunado. Hindi umano nararapat na manatili sa puwesto ang isang barangay official na hindi bakunado. Ayon kay Dino, nakakahiya na ang isang barangay official na nagpapatupad ng batas ukol sa pagbabakuna ang hindi naman pala bakunado. Dapat maging halimbawa ang mga pinuno ng barangay para mahikayat na magpabakuna ang kanyang mga nasasakupan.

Bagama’t hindi nagbanggit ng pangalan ng mga barangay official na hindi bakunado si Dino, may mga report na maraming barangay official ang hindi pa bakunado.

Una nang nagbigay ng direktiba ang DILG sa mga barangay officials na magsumite ng listahan ng mga bakunadong indibiduwal sa kanilang nasasakupan. Kasama sa kautusan ang paghihigpit sa mga hindi bakunado na lumabas ng bahay, ayon sa naunang kautusan ni President Duterte. Kahapon, sinimulan na ang “no vax, no ride” policy sa mga pampublikong sasakyan.

Paigtingin pa ang paghihigpit sa mga hindi bakunado. Magpakita naman ng halimbawa ang mga barangay officials. Sila ang manguna sa pagpapabakuna.