Balewala na si Sec. Duque?
Nagngingitngit si Department of Health (DOH) secretary Francisco Duque III sa Inter-Agency Task Force (IATF) matapos na ipatupad ang maluwag na healthy restriction sa overseas Filipino workers (OFWs) na dumarating sa bansa.
Ayon kay Duque hindi man lang siya kinunsulta ng mga ito bago ipatupad ang ‘‘no quarantine status’’ sa OFWs na dumarating sa Ninoy Aquino International Airport (NAIA). Bagamat bumababa na ang kaso ng COVID sa National Capital Region (NCR) hindi pa dapat na maging kampante ang lahat ng ahensiya sa pagbibigay ng kaluwagan.
Lumalabas na balewala na lamang si Duque sa administrasyon ni President Duterte? Dapat nang mag-isip si Duque kung balewala na siya. Dapat na lumisan na lamang siya upang makaiwas siya sa galit ng taumbayan kapag muling sumipa na naman ang kaso ng COVID na dala ng mga balikbayan.
Nang unang pumutok ang COVID-19 noong 2020, ang sinisi ng taumbayan ay ang kabagalan ni Duque sa paghihigpit sa mga dayuhan na nagmumula sa China. Bumilis ang pagkalat ng virus na hanggang ngayon ay patuloy na nilulutas ng pamahalaang Duterte sa pamamagitan ng pangungutang upang makabili ng bakuna. Ngunit ngayong inilarga na naman ng IATF ang pagluluwag sa health protocols sa mga balikbayan baka dumami na naman ang kaso. Balewala na nga siguro si Duque sa Gabinete ni Digong. Ano sa tingin n’yo?
* * *
Anim na holdaper ang napatay ng Highway Patrol Group at Antipolo City police sa Bgy. San Jose, Boso-Boso Resort, Antipolo City noong Huwebes. Balak holdapin ng mga suspek na nakasakay sa kotse at motorsiklo ang isang gasolinahan pero dumating ang HPG. Bumaba ang isang HPG operative sa mobile car para lapitan ang Rio Sedan na naka-park sa gilid ng gasoline station pero pinapatukan agad ang pulis kasabay nang pagharurot nito kasunod ang riding-in-tandem. Hinabol ito ng mga HPG at nagbarilan hanggang napatay ang mga suspek.
Ayon sa Highway Patrol Group-Task Force Limbas at Antipolo Police ilang araw na nilang minamanmanan ang grupo na nambibiktima ng mga gasoline station at convinience store. Sangkot ang grupo sa holdapan sa Tarlac, Pampanga, Bulacan, Rizal at Metro Manila.
- Latest