EDITORYAL - Masalimuot na isyu sa face shield
NOONG nakaraang linggo, inihayag ni President Duterte na puwede nang huwag mag-face shield sa labas ng tahanan o mga gusali at lilimitahan na lang ang paggamit sa tinatawag na 3Cs (closed, crowded, close contact). Ayon sa Presidente kapag may mga pagdikit-dikit o crowded ang mga tao sa lugar, kailangan ang pagsusuot ng face shield. Halimbawa ay sa mga indoor establishment, sa mga pampublikong sasakyan at mass gatherings, kailangan pa rin ang face shield.
Sabi ng Presidente kaya niya iniutos muli ang pagsusuot ng face shield noon ay dahil nakakatulong din ito kahit paano para maiwasan ang virus. Sabi naman ng IATF, maglalabas sila ng mga bagong patakaran sa pagsusuot ng face shield. Nagpaalala naman ang Department of Interior and Local Government (DILG) na habang naghahanda sa bagong patakaran, dalhin pa rin ng mamamayan ang kanilang face shield dahil nakakatulong ito para maproteksiyunan sa virus.
Habang unti-unti nang inaalis sa katawan ng mamamayan ang face shield, lumalawak naman ang kontrobersiya sa face shield na ipinamahagi ng Pharmally Pharmaceutical Corp. sa Department of Health (DOH). Patuloy ang pag-iimbestiga ng Senate Blue Ribbon Committee sa Pharmally kaugnay sa bilyong pisong COVID-19 supply contracts. Sa pagdinig ng Senado noong Biyernes, inamin ng isang Pharmally official na pinapalitan nila ng expiry dates ang face shields para magmukhang bago at saka idedeliber sa DOH.
Sabi ni Krizie Grace Mago, inutusan siya ni Mohit Dargani, corporate treasurer at secretary para i-tampered ang expiration date ng mga face shield mula sa 2020 ay gawin itong 2021. Ayon kay Mago, naniniwala siyang panloloko ang kanilang ginawa. Kamakalawa, inihayag naman ni Senate Blue Ribbon committee chairman Richard Gordon sa radio interview na hindi na nila makontak si Mago. Wala na umano ito sa tinitirahang condo.
Habang tumatagal, lumalalim, lumalawak at nagiging masalimuot ang kasong kinasasangkutan ng Pharmally. Ngayong nabatid na may ginagawa palang pag-tampered sa expiry dates ng face shield, dapat laliman pa ang imbestigasyon. Pagkaraang kumita ng kompanya ng bilyong piso sa pamahalaan ganito pala ang kanilang ginagawa. Laliman pa ang imbestigasyon dahil pera ng taumbayan ang sangkot. Maaaring hindi lang face shield ang tina-tampered ng Pharmally.
- Latest