Bagitong pulis, patay sa Caloocan
MANILA, Philippines — Pinagbabaril hanggang sa mapatay ng hindi pa nakikilalang suspek ang isang bagitong pulis kamakalawa ng umaga sa Caloocan City.
Kinilala ang biktima na si Pat. Jefferson Valencia, 24, residente ng Gen. Luna, Zaragoza Nueva Ecija at nakatalaga sa Bulacan PPO, 1st Bulacan Provincial Mobile Force Company.
Nangyari ang insidente dakong alas-7:30 ng umaga habang minamaneho ni Valencia ang isang silver gray na sasakyan sa kahabaan ng Clamor Avenue, Brgy. 171, Bagumbong, Caloocan City nang harangin at pagbabarilin ng gunman na nasa 5’5 ang taas, nakasuot ng itim at pulang cap, itim na jacket, itim shorts .
Kaagad binawian ng buhay ang biktima sanhi ng mga tinamong tama ng bala sa katawan habang rumampa pa sa poste ng kuryente ang sasakyan nito matapos mawalan ng control.
Base sa pahayag sa pulisya ng isang saksing 56-anyos na liason officer at residente sa lugar, matapos ang pamamaril ay tumakas ang suspek patungong Bankers Village, Brgy. 171.
Narekober ng mga tauhan ng NPD Forensic Unit sa pangunguna ni P/Capt. Romar Quilang sa crime scene ang anim na basyo ng bala at isang bala ng caliber .9mm pistol.
Agad namang nagsagawa ng follow-up operation ang mga tauhan ng Caloocan Police Sub-Station 9 subalit nabigo silang matukoy ang pagkakilanlan at maaresto ang suspek habang inaalam pa ang motibo sa pagpatay sa biktima.
- Latest