Comelec nagbabala sa mga kumandidato: SOCE, ‘wag dayain
MANILA, Philippines — Binalaan ng Commission on Elections (Comelec) ang lahat ng kandidato na tumakbo nitong nakaraang May 9 elections na huwag doktorin ang isusumite nilang ‘Statement of Campaign Expenditures’ (SOCE) dahil sa may katumbas itong mabigat na parusa sa oras na mapatunayan.
Sa press briefing kahapon, nagpaalala rin si Comelec spokesperson John Rex Laudiangco sa mga kandidato at partidong politikal na kailangang maisumite ang kanilang SOCE may 30 araw matapos ang halalan o sa Hunyo 8 na.
“Ipinapaalala namin sa inyo, may karampatan na administrative penalties kapag ‘di nakapag-file ng SOCE on time, lalong-lalo na sa dalawang beses nang ‘di nakakapag-file,” saad ni Laudiangco, na sinabing maaaring maparusahan ang politiko ng ‘perpetual disqualification’ base sa Republic Act 7166.
“Huwag n’yo nang balakin na doktorin o dayain dahil sa ini-eksamin ng aming campaign finance officer ang mga resibo ng pinagkagastusan. Ang resibo na sina-submit sa amin we are able to verify the statement sa SOCE at actual na gastos na nakikita namin,” dagdag pa ng opisyal.
Lahat umano ng SOCE ay naka-notaryo at sa ilalim ng batas, kapag nagsinungaling at nandaya ay kakasuhan ng perjury at administrative penalty naman kapag dalawang beses na hindi nakapagsumite ng SOCE.
Sinabi pa ni Laudiangco na marami na silang naparusahan ng ‘perpetual disqualification’ dahil sa hindi pagsusumite at pandaraya sa kanilang SOCE kaya huwag umano nilang subukan ang Comelec.
Sa ilalim pa ng batas, ang isang kandidato sa pagka-presidente at bise-presidente ay dapat gumastos lamang ng P10 kada botante, P3 naman sa ibang kandidato sa nasyunal na posisyon na may kinabibilangang partido at P5 sa mga independent. Ang mga political parties ay binibigyan din ng hiwalay na P5 kada botante.
Para sa mga tumatakbo sa lokal na posisyon, maaaring gumastos ang mga may partido ng P3 kada botante sa kanilang nasasakupang lugar at P5 sa mga independent candidates.
- Latest