Mga bakunado sa Quezon City, mahigit 2.4 milyon na

MANILA, Philippines — Umaabot na sa mahigit 2.4 milyon ang mga indibiduwal na fully vaccinated na laban sa COVID-19 sa Quezon City.

Ayon sa Quezon City go­vernment, nasa 2,255,719 na adult residents at workers naman sa QC ang nabakunahan na rin ng isang dose ng vaccine.

Anang lokal na pamahalaan, patuloy rin ang pagbabakuna sa minors with or without comorbidity.

Sa kasalukuyan ay nasa 336,587 na rin ang mga batang nabakunahan sa programa ng lokal na pamahalaan habang nasa 835,283 naman ang nabigyan ng booster shot.

“Sa kabuuan, 5,746,972 doses ng bakuna ang naiturok ng ating #QCProtekTODO Vaccination Program sa tulong ng ating healthcare workers, staff at volunteers!” anang lokal na pamahalaan.

Muli rin naman nitong hinikayat ang mga QCitizens na magrehistro na sa QC Vax Easy upang makatanggap ng schedule ng pagbabakuna.

Maaari anilang bisitahin ng mga ito ang https://qceservices.quezoncity.gov.ph/qcvaxeasy at abangan ang iba pang anunsyo dito sa kanilang Facebook page o bisitahin ang https://qcprotektodo.ph para sa iba pang detalye ng vaccination ­program.