Bebot na angkas sa motorsiklo, dedo sa nakasagiang truck
MANILA, Philippines — Patay ang isang babae na angkas ng isang motorsiklo makaraang masagi ng isang delivery truck sa may Malate, Maynila nitong Linggo ng tanghali.
Nakilala ang biktimang si Jennifer Bulong, 45, residente ng Brgy. Holy Spirit, Quezon City. Nilalapatan din ng lunas sa natamong pinsala ang nagmamaneho ng motorsiklo na si Nonie Luig.
Arestado at nakatakdang sampahan ng kasong reckless imprudence resulting in homicide with physical injury and damage to property ang suspek na si Randy Villadarez.
Sa ulat ng Manila District Traffic Enforcement Unit (MDTEU), dakong alas-11:50 ng umaga nang maganap ang aksidente sa southbound lane ng Taft Avenue, kanto ng Pedro Gil St., sa Malate. Biglang nagkasagian ang dalawang sasakyan dahilan para tumilapon ang dalawang biktima na sakay ng motorsiklo.
Mabilis naman umanong nakaresponde ang Rescue Team ng Maynila kaya naisugod sa naturang pagamutan ang mga biktima ngunit minalas na napuruhan sa ulo si Bulong dahilan ng kaniyang pagkasawi.
- Latest