3 preso sa Bilibid, pumuga
MANILA, Philippines — Tatlong bilanggo buhat sa maximum security compound ng New Bilibid Prison (NBP) ang nagawang makatakas makaraang makipagbarilan sa mga jailguards kahapon ng umaga.
Nakilala ang mga tumakas na sina Arwin Villeza, 35, may kasong homicide at attempted homicide; Drakilou Yosores Falcon, 34, may kasong robbery at homicide; at Pacific Villaruz Adlawan, 49, may kasong frustrated homicide at illegal drugs.
Sa inisyal na imbestigasyon ng Muntinlupa City Police, dakong ala-1 ng madaling araw nang maganap ang pagtakas ng mga preso. Tumalon umano ang mga pugante sa path walk at nakipagbarilan sa mga guwardiya sa Gate 3 at 4.
Sugatan ang tatlong jailguards at isang inmate na tinamaan ng bala dahil sa pamamaril ng mga pugante. Agad silang dinala sa Ospital ng Muntinlupa para gamutin.
Nabatid na hinatulan na ng ‘reclusion perpetua’ o pagkakulong ng 20 hanggang 40 taon ng Parañaque Regional Trial Court si Villeza habang dinidinig pa ang kasomg double murder ni Falcon sa Tandag City, Surigao Del Sur RTC at maging ang kasong Homicide ni Adlawan sa Bacoor City RTC.
Patuloy ang manhunt operation ng BuCor at Philippine National Police sa mga pugante. Nagbabala rin ang pulisya sa publiko na armado at mapanganib ang mga pugante. Samantala, sa inilunsad na manhunt operation, napatay ang ang dalawa sa pumuga, isa dito si Adlawan.
Nakorner si Adlawan sa isang creek malapit sa Manila Cavite Expressway at napatay ng mga tauhan ng BuCor nang manlaban. Natagpuan sa malapit sa bangkay niya ang isang kalibre .9mm na baril.
- Latest
