Karnaper timbog sa Maynila
MANILA, Philippines — Huli sa akto habang lulan pa sa ninakaw na motorsiklo ang isang karnaper, kamakalawa ng gabi sa Paco, Maynila.
Kinilala ang nadakip na si Jefferson Picazo, 31, binata, ng Fabie Estate, Paco, ng naturang lungsod.
Sa ulat ng Manila Police District-Sta. Ana Police Station 6, dakong alas-7 ng gabi nang iulat ni Darius Hilario, 50, ang pagkawala ng Mio type scooter na hiniram niya sa kaanak sa tapat ng kaniyang bahay sa may Road 20, Paco. Inamin niya na nakalimutan niyang tanggalin ang susi bago siya pumasok ng bahay.
Nang madiskubre ang pagkawala ng motor, agad niyang ipinaalam ito sa may-ari at nagtungo sila sa barangay hall ng Barangay 812. Dito nila nakilala ang hitsura ng salarin na tumangay ng motorsiklo sa pamamagitan ng CCTV footage ng barangay.
Agad na humingi ng saklolo ang dalawa sa pulisya na agad na kumilos para hantingin ang suspek. Sa kanilang paghahanap sa Paco, suwerteng naispatan ng biktima at ng mga pulis si Picazo na nakasakay sa ninakaw niyang motorsiklo dahilan para ito arestuhin.
- Latest