NBI nagsagawa ng sariling awtopsiya sa labi ng pintor na si Bree Johnson
MANILA, Philippines — Nagsagawa na ng sariling awtopsiya ang National Bureau of Investigation (NBI) sa labi ng pintor na si Bree Johnson na natagpuang patay sa isang kuwarto sa La Union noong nakaraang Sabado.
Sinabi ni NBI spokesperson Ferdinand Lavin na isinagawa ang awtopsiya nitong Huwebes ng madaling araw. Kumuha sila ng specimen buhat sa labi na isasailalim nila sa laboratory examination.
Nagtungo na rin sa La Union ang kanilang forensic team. Bukod dito, nakikipag-ugnayan din sila sa Philippine National Police (PNP) para ibahagi sa kanila ang mga piraso ng ebidensya na nakalap sa lugar ng krimen.
“Crime Scene Inves-tigation Team (Forensics) motored to La Union this morning to process the crime scene thereat,” ayon kay Lavin.
Kinumpirma ito ni Department of Justice Secretary Menardo Guevarra na nagsabing ang panibagong awtopsiya ay dahil sa kahilingan ng pamilya ni Johnson.
Nangako ang kalihim na maingat nilang susuriin ang resulta ng awtopsiya at mga ebidensya upang makalikha ng tamang konklusyon sa naganap na pagkamatay ni Johnson.
- Latest