171 lugar sa NCR naka-granular lockdown
MANILA, Philippines — Nasa ilalim ngayon ng granular lockdown ang 171 maliliit na lugar sa National Capital Region (NCR).
“Sa tala ng PNP (Philippine National Police), 171 small areas sa Metro Manila ang nasa granular lockdown,” pahayag ni DILG Secretary Eduardo Año kahapon.
Ito’y kasunod na rin nang pagpapairal na ng pamahalaan ng pilot implementation ng Alert Level
System sa NCR, na isinailalim sa Alert Level 4, simula nitong Huwebes, Setyembre 16.
Sa ilalim ng naturang bagong sistema, sa halip na kada rehiyon o probinsiya ang ila-lockdown ng pamahalaan upang mapigilan ang pagkalat ng COVID-19, ay maliliit na lugar na lamang, gaya ng bahay, gusali, sitio, kalsada, eskinita, compound o barangay na nakakapagtala ng mga kaso ng COVID-19, ang ila-lockdown upang maiwasan ang labis na pagkalugi ng ekonomiya ng bansa at makapagtrabaho pa rin ang mga mamamayan.
Kung mapapatunayang epektibo ito sa pagpigil nang pagkalat ng COVID-19 ay ipatutupad na rin ito sa iba pang bahagi ng bansa.
Kabilang sa mga ila-lockdown ay yaong mga lugar na itinuturing na “critical zones” ng local government unit (LGU).
Ang LGUs anila ang mag-i-initiate ng granular lockdown, na tatagal ng dalawang linggo, habang ang PNP ang titiyak ng seguridad at pagtalima ng mga mamamayan sa minimum public health standards.
- Latest