Miyembro ng Abu Sayyaf, timbog ng NBI
MANILA, Philippines — Nasakote ng mga tauhan ng National Bureau of Investigation (NBI) ang isang itinuturong miyembro ng teroristang Abu Sayyaf Group (ASG) sa isang operasyon sa Culiat, Quezon City nitong Setyembre 10.
Sa ulat na inilabas kahapon, kinilala ni NBI Officer-In-Charge (OIC) Director Eric B. Distor ang nadakip na si Albazir Abdulla, alyas Abu Saif.
Sa ulat ng NBI-Counter Terrorism Division, nakatanggap sila ng intelligence report na namataan si Abdulla sa Metro Manila.
Nagsagawa ng operasyon ang ahensya sa tulong ng Armed Forces of the Philippines (AFP) hanggang sa matukoy siya sa sa Brgy. Culiat, Quezon City.
Dito nagkasa ng magkasanib na operasyon ang NBI at AFP na nagresulta sa pagkakadakip ni Abdulla sa naturang lugar.
Si Abdulla ay sangkot sa 2001 Golden Harvest Plantation kidnapping.
Matatandaan na noong 2001, sinalakay ng ASG ang naturang plantasyon sa Brgy. Tairan, Lantawan, Basilan sa pangunguna ng nasawing pinuno nila na si Isnilon Hapilon. Dinukot nila ang 14 na manggagawa kung saan dalawa sa kanila ang pinugutan. Nagawang makatakas ng mga biktima sa gitna ng operasyon ng militar laban sa teroristang grupo.
- Latest
