87-lola patay sa sunog

MANILA, Philippines — Patay ang isang 87-anyos na lola makaraang maipit sa loob ng naglalagablab niyang bahay sa sunog na naganap   sa isang residential area sa Parañaque City, kahapon ng madaling araw.

Nakilala ang nasawi na si Lolita Matadling, nakatira sa Valenzuela Compound, Kaingin Road, Brgy. Sto. Niño, ng naturang lungsod.

Sa ulat ng Bureau of Fire Protection (BFP), dakong ala-1:12 ng madaling araw nang unang pumutok ang sunog na nagmula sa bahay ni Eduardo Matadling, anak ng nasawing lola.

Agad na naiakyat ito sa unang alarma at ikalawang alarma dakong ala-1:25 ng madaling araw. Dakong alas-2:20 na nang makontrol ang pagkalat ng apoy at tuluyang nagdeklara ng fire out ang mga bumbero dakong alas-2:52 ng madaling araw.

Bukod kay Matadling, sugatan din sa insidente si Patrick Ortega, isang fire volunteer habang isinugod din sa pagamutan ang 72-anyos na si Narsisa Monteverde dahil sa sobrang hilo at pagsakit ng ulo dulot ng makapal na usok.

Nabatid na nakaratay na lamang sa higaan  ang lolang biktma  dahil sa sakit at hindi na nagawang mailabas ng bahay ng mga kaanak dahil sa bilis ng pagkalat ng apoy.  Bumagsak pa ang sahig ng ikalawang palapag ng bahay nang tuluyang lamunin ito ng apoy.

Nadamay rin ang tinata­yang 30 bahay sa sunog na pawang gawa sa light materials at nagresulta ng pagkawala ng tahanan ng nasa 60 pamilya.