Standhardinger patok sa BPC race

MANILA, Philippines — Huwag na tayong ma­gulat sa mga numerong itinatala ni Christian Standhardinger para sa nagdedepensang Barangay Ginebra sa 2023 PBA Governors’ Cup.

Sa pagsalo sa naiwang trabaho ni injured Japeth Aguilar ay kumamada ang Fil-German big man ng mga averages na 22.9 points, 10.2 rebounds at 6.0 assists.

Sa 127-93 pagsibak ng No. 3 Gin Kings sa No. 6 NLEX Road Warriors noong Linggo ay nagposte si Standhardinger ng 20 points, 8 rebounds at 2 assists para labanan ang No. 2 San Miguel Beermen sa best-of-five semifinals series.

Tumipa ang 6-foot-8 na si Standhardinger ng 42.8 statistical points para mamuno sa karera sa Best Player of the Conference (BPC) award ng season-ending tournament.

Ang No. 1 overall pick ng San Miguel noong 2017 PBA Rookie Draft ay hinirang na BPC winner ng torneo noong 2019 para sa NorthPort.

Nasa ilalim ni Standhar­dinger sa BPC race sina CJ Perez (39.3 sps) at six-time PBA MVP June Mar Fajardo (37.6 sps) ng San Miguel, Calvin Oftana (36.1 sps) at Roger Pogoy (35.8 sps) ng TNT Tropang Giga.

Ang iba pang nasa Top 10 ay sina Jamie Malonzo (33.5 sps) ng Ginebra, scoring leader Juami Tiongson (33.30 sps) ng Terrafirma, Maverick Ahanmisi 3.27 sps) ng Converge, Calvin Abueva (32.6 sps) ng Magnolia at TNT sophomore Mikee Williams (32.5 sps).

Nasa No. 11 sina reigning MVP at Commissioner’s Cup BPC winner Scottie Thompson (31.6 sps) ng Ginebra at NLEX rookie Brandon Ganuelas-Rosser (31.6 sps).

Samantala, bumabandera si Rondae Hollis-Jefferson ng TNT sa labanan para sa Best Import sa kanyang 59.0 sps sa limang laro niya bilang kapalit ni Jalen Hudson.

Nagposte ang dating NBA first-round pick ng mga averages na 31.0 points, 12.0 rebounds, 5.8 assists, 2.4 steals at 1.0 block shot para akayin ang Tropang Giga sa No. 1 spot sa quarterfinals.

Nasa ilalim ni Hollis-Jefferson sina Antonio Hester (56.0 sps) ng Magnolia at dating Converge import Jamaal Franklin (56.0 sps) habang nasa No. 6 si reig­ning Governors’ Cup Best Import Justin Brownlee ng Ginebra sa kanyang 51.5 sps sa ilalim ni Cameron Clark (51.8 sps) ng SMB.