Pangulong Marcos sinalubong ni outgoing Pres. Duterte sa Malacañang

MANILA, Philippines — Personal na sinalubong ni outgoing President Rodrigo Duterte si incoming President Ferdinand “Bongbong” Marcos Jr. nang makarating ito sa Palasyo ng Malakanyang para mag-courtesy call sa kaniya.

Ito ay bago ang pormal na panunumpa ni Marcos Jr. bilang ika-17 pangulo ng Pilipinas na idinaos sa National Museum.

Sa pagdating ni BBM ay agad na lumagda ito sa guestbook ni Pangulong Duterte bilang kaniyang pinakahuling panauhin sa Malakanyang.

Pagtapos nito ay nagkaroon ng maikling pagpupulong ang dalawang Pangulo at saka naman hinandugan ng departure honors si Duterte sa pangunguna ng Presidential Security Group (PSG) na sinaksihan ng mga opisyal ng kaniyang gabinete.

Samantala, hindi naman na dumalo pa sa seremonya ng inagurasyon ni PBBM si Duterte na agad lumipad patungo sa Davao City.

Habang si incoming President Marcos naman ay dumiretso na agad patungo sa National Museum of Fine Arts kung saan ginanap ang kaniyang oath-taking bilang bagong pangulo ng Republika ng Pilipinas.