Duterte, paghahanap ng magagandang babae ang aatupagin pagbaba sa pwesto
MANILA, Philippines — Muling nagbiro si Pangulong Rodrigo Duterte kamakalawa kung saan sinabi niya na dahil patapos na ang kanyang trabaho sa Malacañang aatupagin naman niya ang paghahanap ng magagandang babae.
Sa kanyang talumpati sa Central Post Office Building sa Maynila, sinabi ng Pangulo na hanggang tingin na lamang naman siya dahil matanda na.
“Ang trabaho ko na lang ngayon magtingin ng magandang babae…Okay na ako. Tingin lang, hindi ako naga-abduct, hindi ako naga-ano, basta tingin lang kasi matanda na,” ani Duterte.
Sinabi rin niya na hindi siya dapat katakutan kung mayroong titigan pero okay lang sa kanya kung magpapakilala ang titingnan.
Wika pa niya na 77 taong gulang na siya at alam ng kanyang partner na mahilig siyang tumingin sa magagandang babae.
“Alam man ng asawa ko ‘yan kasi mahilig man gyud ako magtingin ng magagandang babae. Sabi ko huwag kang — hanggang diyan-diyan lang ako. Wala na akong balak na… Pero hindi ko na lang sabihin kasi magkabungguan tayo dito,” ani Duterte.
Nakatakdang bumaba sa posisyon si Duterte sa Hunyo 30 at ilang beses na niyang binanggit na magiging isang ordinaryong mamamayan na lamang siya at uuwi sa kanilang probinsiya sa Davao.
- Latest