Malacañang ipinagtanggol ang pagbibigay ng dating frequencies ng ABS-CBN sa mga Villar
MANILA, Philippines — Ipinagtanggol kahapon ng Malacañang ang naging desisyon ng National Telecommunications Commission (NTC) na ibigay ang dating frequencies ng ABS-CBN sa isang media company na pag-aari ng pamilya dating senator Manny Villar.
Ayon kay Cabinet Secretary at acting Presidential Spokesperson Karlo Nograles, ang desisyon ay base sa mga rules at kasalukuyang batas.
Sinabi pa ni Nograles na walang binanggit na pangalan o kumpanya ang NTC nang kunin ang legal na opinyon ng Department of Justice para sa pagbibigay ng available na frequencies.
Sinabi rin ni Nograles na nang nagtungo ang NTC sa Office of the Executive Secretary para kunin ang opinyon tungkol sa kapangyarihan na ibigay ang available at hindi ginagamit na frequencies ay wala rin itong binanggit na pangalan o anumang entity.
Ibinigay ng NTC sa Advanced Media Broadcasting System (AMBS) na pag-aari ng mga Villar ang isang provisional authority para mag install, operate at maintain ng isang digital television broadcasting system sa Metro Manila at Mega Manila sa pamamagintan ng Channel 16. Pansamantala ring ibinigay ang Channel 2 sa AMBS para sa “simulcast purposes” hanggang sa analog shut-off scheduled sa 2023.
Matatandaan na nabigo ang ABS-CBN na makakuha ng bagong franchise sa House of Representatives, halos dalawang taon na ang nakakaraan na naging dahilan kung bakit libo-libong empleyado ng kompanya ang nawalan ng trabaho.
- Latest