Kiko: Delivery riders ‘di na mag-aabono sa mga order
MANILA, Philippines — Hindi dapat pinag-aabono ang motorcycle delivery riders sa mga nakansela o scam na order!
Ito ang iginiit ni vice presidential candidate at Senador Kiko Pangilinan kasunod ng pagpasa ng Senado sa ikatlo at huling pagbasa sa Senate Bill 2302 kung saan hindi na aabonohan ng motorcycle delivery riders ang paunang bayad sa mga inorder na produkto.
“Maraming pagkakataon na umuuwi ang ating mga riders na pagod at luhaan dahil abonado na naman. Hindi ganito ng kapalarang dapat sinasapit ng ating order heroes,” wika ni Pangilinan, co-author ng panukala.
Ayon kay Pangilinan, hindi makatwiran na ipaubaya pa sa motorcycle riders ang pag-aabono sa order gayong sagot na nila ang motor at gasolina.
“Hindi naman buong kita ang napupunta sa kanila. Sa pagsasabatas nitong bill, wala nang abonadong delivery riders, cancelled man o scam na order,” dagdag pa ni Pangillinan.
Kapag naisabatas, hindi na maaaring obligahin ang mga grocery, botika, at delivery service provider ang delivery riders o mga driver na mag-abono sa mga order. May parusang multa at pagkakakulong sa sinumang lalabag dito.
Dahil sa mahalagang papel na kanilang ginagampanan lalo ngayong pandemya, sinabi ni Pangilinan na dapat bigyan ng proteksiyon ang mga delivery rider.
- Latest
