Plastic barriers ‘di requirement sa face-to-face classes – DepEd

MANILA, Philippines — Hindi requirement ang paglalagay ng plastic barrier sa desk ng mga estudyanteng lumalahok sa pilot implementation ng face-to-face classes.

Ito ang ginawang paglilinaw kahapon ni Department of Education (DepEd) Undersecretary Nepomuceno Malaluan, kasunod ng obserbasyon na may mga estudyanteng nahihirapang makita at marinig ang itinuturo sa kanila ng guro dahil sa mga plastic barrier.

Ayon kay Malaluan, hindi kasama ang paglalagay ng plastic barrier sa mga guidelines na inilatag ng DepEd at ng Department of Health (DOH) para sa naturang pilot run.

Posible aniyang naisagawa ito matapos na imungkahi ng mga magulang sa mga pulong dahil kasama sa framework ng aktibidad ang ‘shared responsibility’ ng DepEd, local government unit (LGU) at ng mga magulang.

Sinabi rin ni Malaluan na ipinatatanggal na rin naman ang plastic barriers dahil may obserbasyon na nakakasagabal ito sa airflow sa silid-aralan.

Binigyang-diin din niya na ang mahalaga ay naipapatupad ang physical distancing sa mga estudyante.

Samantala, tiniyak din naman ni Malaluan na regular na nagsasagawa ng disinfection ang mga paaralan bago at matapos ang klase.

Sa katunayan aniya ay may disinfection sa pagitan ng mga klase sa umaga at hapon, bukod pa sa mas masusing disinfection tuwing weekend, upang matiyak na ligtas ang mga mag-aaral at mga guro laban sa COVID-19.